મહિલા મહિમા

મિત્રો, આપણી પરંપરામાં સ્ત્રીને શક્તિ, શ્રદ્ધા, સભ્યતા અને સંસ્કૃતિનું સ્વરૂપ ગણીને વંદન કરવામાં આવે છે. વેદકાલીન અને પૌરાણિક સમયમાં નારીપ્રધાન ગૃહ વહીવટ કે રાજ્ય સંચાલન વ્યવસ્થા હોવાના અનેકો ઉદાહરણો જોવા મળે છે. જેમ વિધાત્રી, સરસ્વતી, લક્ષ્મી, શક્તિ, અન્નપૂર્ણા, ગંગા, કાલિકા, મોહિની વગેરે નારી પાત્રો વગર શાસ્ત્રો અધૂરા છે, જેમ માતા, બહેન, પત્ની, પુત્રી વગર ઘર અધૂરું છે, તેવી જ રીતે આપણે સૌએ સાંભળ્યું કે કહ્યું પણ હશે કે મહિલાઓ વિના ખેતી પણ અધૂરી છે. પુરુષો તો સવારે વાડી-ખેતરે જાય અને સાંજે પાછા આવે એટલે એમનું કામ પૂરું મનાય. પણ બહેનો માટે તો શું સવાર કે શું સાંજ... તેમનું ખેતીકાર્ય તો ચાલુ જ રહે. અને આ કારણે જ તેને ‘માતા’ની પદવી અપાય છે. એક સેમ્પલ સર્વે અનુસાર ૩૦૦૦ માંથી ૨૬૮૫ (૮૯.૫%) કિસ્સામાં જમીન માલિકી પુરુષો પાસે અને માત્ર ૧૦.૫% જમીન માલિકી મહિલાઓ પાસે હોવા છતાં પણ ખેતીમાં મહિલાઓની કૃષિકાર્યોમાં ૬૮% ભાગીદારી નોંધાયેલ છે. 

સામાન્ય રીતે એમ માનવામાં આવે છે કે સ્ત્રીઓ માત્ર હૃદયથી વિચારે છે અને લાગણીમાં જ જીવે છે. પરંતુ આજની સ્ત્રી શક્તિ કોઈની લલચામણી વાતોમાં આવી ફસાય જાય તેવી શક્યતાઓ ઘણી ઘટી ગઈ છે. આજે નારી શિક્ષિત છે, વિચારશીલ છે, સજાગ છે. તેથી જ તો દરેક ક્ષેત્રમાં આગળને આગળ વધી રહી છે. વિશ્વમાં સંશોધન, શિક્ષણ, સત્તા, સૈન્ય સહીત દરેક જગ્યાએ મહિલાઓ પોતાના બુદ્ધિ કૌશલ્યથી માત્ર પુરુષની સમોવડી નહિ પરંતુ એક કદમ આગળ જોવા મળે છે. કોમ્પ્યુટર કે મશીનગન ચલાવતી નારી બાળ ઉછેર કે ગૃહ સંચાલનમાં પણ પાછળ નથી રહી. મહિલા સશક્તિકરણનું ઉત્તમ ઉદાહરણ ‘અમૂલ’ તો આપણી આંખ સામે જ છે.

આજે યુવતીઓના વેવિશાળ કે લગ્ન સંબંધોની વાત આવે ત્યારે ખેતીકામ કરતા યુવાનોને અછૂત ગણવાનો ધારો ચાલી રહ્યો છે. માત્ર નોકરી કે અન્ય કોઈ ‘વ્હાઈટ કોલર’ વ્યવસાય કરતા યુવાનોને અગ્રતા આપવાના આ રિવાજને અટકાવવા માટે આજની મહિલાઓએ જ આગળ આવવું પડશે. ભલે આકાશી રોજી ગણાતી હોય પણ ખેતી એ કુદરત સાથે જોડી રાખતી કાયમી રોજગારી છે. આ મુખ્ય મુદ્દાને ધ્યાને લઈને ખેતીમાં નવા પ્રયોગો કરવા ઈચ્છતી યુવાન બહેનો ખેડૂત જીવનસાથી પસંદ કરવામાં પોતાના વાલી પાસે થોડી જીદ પણ કરે તો સર્વથા આવકાર્ય છે. પોતાના સંતાનોને કૃષિ અને પર્યાવરણ સાથે જોડાવાનું કામ સો શિક્ષક કરતા પણ વધુ મહાન ગણાતી સ્ત્રીઓ જ કરી શકે છે,

રાષ્ટ્રને ખરા અર્થમાં હરિયાળા વિકાસના માર્ગ પર લઇ જવા માટે જ્યારે મહિલાઓ આગળ આવશે ત્યારે જ ખરા અર્થમાં ખેતી સમૃદ્ધ થશે. આંતરરાષ્ટ્રીય મહિલા દિવસ (૮ માર્ચ) અને રંગપર્વ ધૂળેટી (૧૩ માર્ચ) ની શુભકામનાઓ સાથે....